Zülf ü sîmîn cisming ef’î genc-i Kârûn üstine

Genc üze sâhir közüng ef’îga efsun üstine

Derd-i ‘ışkıng ol ki koydı cân-ı mahzun üstine

Didi körgeç ‘ârızıng ol kadd-i mevzun üstine

     İy kading tûbî vü cennet hadd-i gülgûn üstine

     Körmedi devrân sining dik ay gerdûn üstine

Taptı cân her dem öler hâletde bu cism-i za’îf

La’lidin cân-bahş söz ayturda ol şûh-ı zarîf

Kaldı közüm tîre cismim haste vü cânım nahif

Zülf ü köz ü la’li hecriga bola alman harîf

     Boldı sözüm nâzik ü könglüm hoş u tab’ım latîf

     Her kaçan saldım nazar ol şekl-i mevzûn üstine

 

Kilse Çîn suret-geri her dem cemâling kaşığa

Cân fidâ kılgay hem ol dem sûreting nakkâşıga

Lâledür şîrîn lebing Ferhâdı kim kan yaşıga

Gark olup tüşmiş güzârı hecr tag u taşıga

     Serv anıng dik kâmeting hayrânıdur kim başıga

     Kıldı kuşlar âşiyân andak ki Mecnûn üstine

 

Köz yolın iy ‘ışk her sâ’at tola yaş iyleme

İy köngül yaşımga pergâlengni yoldaş iyleme

İy köz eşkimni sarıg yüzümge dür-pâş iyleme

     Her dem iy köz yaşı yüz körmey mini fâş iyleme

     Devletimdin agnadıng yıllar çu altun üstine

Cübbe-i sincâbıng içre vusla vusla kâkumı

Tugdı hicrân şâmıda bir bir sa’âdet encümi

Bar kamer ‘akrebde iy ‘ışkıng melâmet kulzümi

‘Ârızıng kâfûrıda ol zülf-i müşkîn kej-dümi

     ‘Anberîn kaşıng hamıda hâl dik köz merdümi

     Müşk-i terdin nokta-i sülsî durur nûn üstine

 

Tâ köngül saydıga koydı ol gazâl-i Çîn köngül

Boldı şîr-efkenler a’zası ara hûnîn köngül

Bes ki tartar her sanemdin bir cefâ gamgîn köngül

Kıldı cevridin alarnıng terk-i ‘akl u dîn köngül

     Niçe çiksün hûblar ilgidin cefâ miskin köngül

     Munça mu âfet kilür bir katre-i hûn üstine

 

Çün Nevâyî eşki bahr oldı çikip renc ü ta’ab

Kimelikdin közleri ol bahr ara taptı lakab

Közide tang yok eger tutung makâm iy nûş-leb

Çün kirer il kimege kılmak üçün ‘îş ü tarab

     Ger vatan lutfî közide tutmadıng yoktur ‘aceb

     Öy koparmaglıg irür düşvâr Ceyhûn üstine