Ko‘ksimni to‘ldirdi binafsha bo‘yi,
Siyohtus ranglari dilim yayratdi.
Borlig‘im egallab tashrifing o‘yi,
Kelar yo‘llaringga ko‘zim qaratdi.

Sendan umid uzgan kunlarim kechdi
Va haqdir seni ham ranjitganlarim.
Kimlardir biz uchun qasamlar ichdi,
Kimlardir biz uchun to‘qidi irim.

Barchasi, barchasi bir taxmin edi,
Maydagap kunlarning mubham tashxisi.
Mavhum xayollardan qutqardi endi
Bizlarni bog‘lagan muhabbat hissi.

U borki, biz uchun tatiydi bahor,
Bahorga aylanib yoshlik tatiydi.
Axir gul tugadi ko‘ngillar yakbor,
Gullagan dillar bir-birin taniydi.

Bilganim birgina shu muhabbatdir,
Qolganlari, bilmam, juda g‘alatdir,

Juda g‘alatdir…