Гёгерип бир гёк ахшамлар болгъанда, 
Саргъалып бир сари танглар къатгъанда, 
Сари агъачлар башын бюркеп, буз салгъанда, 
Саргъалгъан сари аязны туманы, 
Тувумунда тулпар тувгъан атадан 
Ахатлы Гьамзатны уланы 
Аналардан арслан тувгъан Гьайбулла! 
Сагъа, Гьайбулла, он етти йыл дегенде, 
Оьмюрлеринг он етти гюн къалгъанда, 
Еригизден танглап, сагъа къыз да алгъан. 
Къыз аривюнг къарап бетин гёргюнче, 
Шол хабарлар сагъа гелип англанды: 
Къангалыда болгъан сизин еригиз, 
Еригизге къарнайлар къош салгъан деп, 
Ягъаланы басып, сызакъ этген деп, 
Сени атанг Къангалыгъа гетген деп. 
Чюйден алып, савутларынг байладынг, 
Сен атангны артын тутуп гьайдадынг, 
Алгъасадынг, сен атанга тез етдинг, 
Бир атанга макътав да этип, сёз де этдинг: 
- Къайт-къайт, атам, бу ёлунгдан, барма чы, 
Оьз балангны терс айыпгъа салма чы! 
Макътав да этип, шонда атасын къайтарып, 
Юрюп баргъан Къангалыны башына, 
Тилей баргъан къарнайланы къошуна: 
- Мен чи сизге тилемеге гелгенмен, 
Гьаригизге Аллагьны айтып эсгерип, 
Сизден болгъан зиянланы терс гёрюп. 
Энниден сонг магъа зиян этмегиз, 
Мени булан терс ёллагъа гетмегиз! 
Умутум бар магъа хатир этер деп, 
Мени булан яхшы ёлгъа гетер деп. 
Шону да айтып, шол Гьайбулла къайтды, дей. 
Къойчулар жыйылышып ой да этген, 
Одаманы туруп шонда сёз де этген: 
- Къолугъузгъа иргъакъ таякъ алыгъыз. 
Онгарылып, сиривлеге барыгъыз, 
Алып барып, бир сагасына салыгъыз, 
Сёйлей гелсе, къарамагъыз сёзюне, 
Тилей гелсе, сиз бакъмагъыз оьзюне! 
Гьайбуллагъа башгъа хыял гелмеген, 
Я шоланы шолайлыгъын билмеген, 
Шол Гьайбулла хантав баргъан шолагъа, 
Шол къызбайлар къуршап алгъан арагъа. 
Къуршап барып, бирден урду, дей, 
Шол батырым бюдюремей турду, дей. 
Бюдюрерми батыр эрни юреги?! 
Исмайылда къалгъан экен тюбеги. 
Шол Исмайыл шонда къача башлагъан, 
Бир бурулуп къарамагъан артына, 
Етишмейли токътамагъан юртуна. 
Ятлагъа барып, къувун салмагъан, 
Ювугъуну бир кёмегин алмагъан. 
Ананг оьлсюн, яллы бёрю Гьайбулла! 
Шол къызбайлар къуршап алгъан арагъа, 
Башына тийген таякъ яра да. 
Ярачы ёкъ яраларын байлама, 
Къурдашы ёкъ макътав этип сёйлеме. 
Башлыкъ булан яраларын байлагъан, 
Бир Аллагьгъа макътав этип сёйлеген: 
- Ашгьаду охуп, гелтиремен салават, 
Геп-гертилей этермен, - деп, - къазават! 
Къазакъ улан яссы къолун яйды, дей, 
Явлагъа бир яйылышып чапды, дей, 
Бёлеклеге гьайдап салгъан яртысын, 
Яралы этип, уруп йыкъгъан алтысын, 
Тирсегинден къара къанлар акъдыргъан, 
Бары халкъны тамашагъа бакъдыргъан, 
Къарнайгъа савгъат этип, сал сюеклер бакъдыргъан!.. 
- Умсалимат, къызардашым, бир жаным! 
Аманатгъа тапшураман хынжалым... 
Амалымны васиятын бузман деп, 
Амалымдан бир гюн артда къалман деп, 
Яхшы Аллагьдан тилей туруп ажжалын, 
Сариек йыланлардай къарышгъан, 
Сайлангъан батырлардай чабушгъан, 
Къувнай чыкъгъан къувунланы аз да этген, 
Амалыны васиятын парз да этген!