- Тур-турсана, мени Абдуллам, турсана! 
Юрт ягъаны басып гелген явлар бар, 
Ягъалагъа явлар гелди, урулду, 
Сягъа тенгли батыр эрлер къырылды, 
Къартны-къуртну къоймай тура къайтмагъа, 
Къатын-къызны олжа тута сатмагъа! 

Абдуллам юхлай болгъан, уянды: 
- Турмайман, мен абайым, турмайман! 
Башым авруй, мени абайым, оьлемен, 
Оьлюмюмню бугюн сенден гёремен! 

- Башынг авруй буса, мени Абдуллам, ят, юхла! 
Бешиклеге сени салса, бише деп, 
Гьайлеклеге салса дагъы, тюше деп, 
Эки тизим бешик этип, чайкъадым, 
Эки къолум къолбав этип, байладым, 
Аямда алты ай къаймакъ ялатдым, 
Тёбемде теке улакъдай ойнатдым, 
Къысгъа гече, мени Абдуллам, къыркъ туруп, 
Къыркъ тамурдан сагъа берген акъ сютюм 
Яралардан ал къан болуп агъылсын! 
Мен бу гече сагъа этген "алгъышлар" 
Бойнунга гьайкел болуп тагъылсын! 

- Къоймайсан, мени абайым, къоймайсан, 
Мени чи оьлгенимден тоймайсан! 
Бу гече, мени абайым, тюш гёрдюм: 
Оьрдеги уьйде гьаракъы-баллар ичилип, 
Тёбенги уьйде енгсиз халат бичилип, 
Къабакъ алгъа агъач атлар тартылып, 
Ону уьстюне сарасанлар артылып. 

- Оьрдеги уьйде гьаракъы-баллар ичилсе, 
Шербет сувунг сама тюгюлмю? 
Тёбенги уьйде енгсиз халат бичилсе, 
Акъ гебининг сама тюгюлмю? 
Къабакъ алгъа агъач атлар тартылса, 
Сынажада сал сюегинг тюгюлмю? 
Ону уьстюне сарасанлар артылса, 
Абдулла есир сама тюгюлмю? 

Шонда Абдуллам ачувлангъан, шамлангъан, 
Ялан къаптал чюйден савут сермеген, 
Ялан маси алашасын ерлеген, 
Узатылгъан - къанжыгъагъа етмеген. 
Анасы барып, яврунуна къакъды, дей... 
Къамучу уруп, ягъалагъа чапды, дей. 

Етип баргъан ягъадагъы явлагъа, 
Бек белсенип, къатты урунгъан давлагъа. 
Бек белсенип, шонда Абдуллам бек тюшген, 
Шол явлагъа болмагъандай иш этген, 
Оьзенгилер сызар-сызмас къан тёкген, 
Къакъалар толар-толмас баш гесген. 
Абдуллама онгсуз ерден окъ тийген, 
Ол да, хужу, оьлер йимик бек тийген. 
Бир бурулуп, онг ягъына къараса, 
Не болду деп, къарамагъа агъав ёкъ, 
Бир бурулуп сол ягъына къараса, 
Гётерилип, ерден алма инив ёкъ. 
Къурдашыны атын айтып къычыргъан. 
Чабып гелген жан къурдашы ягъына. 

- Абдуллангны сал сюеги - сари алтын, 
Тартып, иним, къучагъынга алсана, 
Белим чертип, ат белине салсана, 
Абайыма савгъат этип барсана! 

- Абдулламны сал сюеги сари алтын, 
Тартып бугюн къучагъыма алмайман, 
Белинг чертип, ат белине салмайман, 
Абайынга савгъат этип бармайман. 
Яхшы игитлер йимик атда олтур чу, 
Душманланы гёзюн къандан толтур чу! 
Яхшы игитлер йимик атда олтургъан, 
Душманланы гёзюн къандан толтургъан, 
Гьайдап баргъан къапусуну алдына: 
- Ачылмагъыр, анам, къапуланы ачсана! 
Мен баланга тербенмесдей окъ тийген, 
Ол да, хужу, оьлер йимик бек тийген, 
Сен баланга бир бурлугъуп бакъсана! 
- Сен балнма окъ тиймесин, топ тийсин, 
Шол да сагъа оьлер йимик бек тийсин! 
Сен балама бир бурлугъуп бакъмайман, 
Атынгны башын тыгъырыкъгъа бурсана, 
Сен атынга уьч къамучу урсана; 
Сени гёрме къурдашларынг гелгинче 
Тыгъырыкъда ат ойната турсана! 

Атны башын тыгъырыкъгьа бурду, дей, 
Шонда атына уьч къамучу урду, дей, 
Оьзюн гёрме къурдашлары гелгинче 
Тыгъырыкъда ат ойната турду, дей. 
Ат уьстюнде Азирейил гелди, дей, 
Азирейил азиз жанын алды, дей. 

- Оьлер йимик уллуму эди ярасы? 
Сен балама къолу тийген къызбайны 
Улуй къалсын мени йимик анасы! 

- Къабагъалар, мени анам, боюнда 
Къуба къазлар энни буса къозлайдыр, 
Сени баланга къолу баргъан къызбайны 
Сенден алдын абайлары бозлайдыр! 
Бир сагъа чы бир гюн оьлюм, бир гюн яс, 
Олагъа чы гьаман йылав, гьаман яс!