Rauf Parfi

1.


Qushlar, qushlar, qator-qator,
Qushlar, uyga qaytingiz,
Abdullajon qaytmas... zinhor,
Yor-do'stlarga aytingiz.

O'ynar bo'ron, o'ynar bo'ron,
O'ynar mening boshimda.
Endi yo'qdur Abdullajon
Yigirma besh yoshinda.

Yo'llar uzun, yo'llar uzun,
Kunlar ham ko'p cho'zildi.
Qonli yoshlar to'kdi ko'zim,
Jigar-bag'rim ezildi.

Poyezd chopar, poyezd chopar,
Poyezd chopar Sibirdan.
Abdullajon jonsiz yotar,
Tobutlari temirdan.

Bo'zlar osmon, bo'zlar osmon,
Bo'zlab bersa bo'zto'rg'ay.
Ko'zlarini Abdullajon
Bir dam ochsa na bo'lg'ay!?

Nafas olmay ul uxlaydi,
Ko'kragida o'ng qo'li.
Yel yig'laydi, el yig'laydi,
Yig'lar o'zi ham o'lim.

2.

Aziz do'stim, qaylarda qolding?
Ko'rib turib seni ko'rmadim.
So'radimu men dardu holing,
Men dardu holingni so'rmadim.

Sen yonib ketarsan yodimda,
Biron sharpa, tovush eshitsam,
Go'yo mana, hozir oldimga
Otilib kirarsan eshikdan.

Shamol kabi uchib o'tgaysan,
Shovullaysan boshimda har zum.
Aytilmagan qo'shiq aytgaysan,
Yaproqlarni otgaysan uzib.

Doim birga va doim judo
Bag'ridan bechora ko'zlarim.
Buncha xasis bo'lmasa dunyo?
Toptaydi o'zining izlarin.

Nahot, do'stim, shu qabr - senmi,
Senmi yozilmagan shu kitob?
Ko'milarmi hech qachon sevgi?
Men javob istayman, javob.

Aziz do'stim, qaylarda qolding?
Ko'rib turib seni ko'rmadim.
So'radimu men dardu holing,
Men dardu holingni so'rmadim.

3.

Sen tark etding yorug' olamni,
Sen butunlay tark etding, yohu.
Tinglamaysan mening nolamni,
Tinglamaysan, chorasiz ohu.

G'amli uyda qirq kun yonur sham,
Sen uyimda yonursan abad.
Qayta tug'iladir dunyo ham,
Sen dunyoga kelmaysan faqat.

Ohim mening buzgay samoni,
Nafasim aylanur quyunga.
Sovuq yerga qo'ydikmi seni?
Kerakmiding shunchalar unga?!

Yigirma besh yoshda ketding sen,
Juda erta ketding, do'stginam.
Hey ajal! Maqsadga yetding sen,
Yigirma besh yoshdaman men ham...

Yigirma besh yoshimni qo'shdim
Yigirma besh yoshingga sening.
Haddan ziyod bu alam, do'stim,
Bu kun ellik yoshim bor mening.

Sen tark etding yorug' olamni,
Sen butunlay tark etding, yohu.
Tinglamaysan mening nolamni,
Tinglamaysan, tinglamaysan-ku...

* Rauf Parfi * (Abdullajon` - Rauf Parfining harbiyda halok bo'lgan jiyani) * 1965


*     *     *


Қушлар, қушлар, қатор-қатор
Қушлар, уйга қайтингиз.
Абдуллажон қайтмас... зинҳор,
Ёр-дўстларга айтингиз.
Ўйнар бўрон, ўйнар бўрон,
Ўйнар менинг бошимда.
Энди йўқдир Абдуллажон
Йигирма беш ёшинда.
Йўллар узун, йўллар узун,
Кунлар ҳам кўп чўзилди.
Қонли ёшлар тўкди кўзим,
Жигар-бағрим эзилди.
Поезд чопар, поезд чопар,
Поезд чопар Сибирдан.
Абдуллажон жонсиз ётар,
Қароргоҳи темирдан.
Бўзлар осмон, бўзлар осмон
Бўзлаб берса бўз тўрғай.
Kўзларини Абдуллажон,
Бир дам очса на бўлғай.
Нафас олмай ул ухлайди,
Қўкрагида ўнг қўли.
Ел йиғлайди, эл йиғлайди,
Йиғлар ўзи ҳам ўлим.

              II

Азиз дўстим, қайларда қолдинг?
Кўриб туриб сени кўрмадим.
Сўрадиму мен дарду ҳолинг,
Мен дарду ҳолингни сўрмадим.
Сен ёниб кетарсан ёдимда,
Бирон шарпа, товуш эшитсам,
Гўё мана ҳозир олдимга
Отилиб кирарсан эшикдан.
Шамол каби учиб ўтгайсан,
Шовуллайсан бошимда ҳар зум.
Айтилмаган қўшиқ айтгайсан,
Япроқларни отгайсан узиб.
Доим бирга ва доим жудо
Бағридан, бечора кўзларим.
Бунча хасис бўлмаса дунё —
Топтайди ўзининг изларин.
Наҳот дўстим, шу қабр — сенми?
Сенми ёзилмаган шу китоб?
Кўмиларми ҳеч қачон севги?
Мен жавоб истайман, жавоб.
Азиз дўстим, қайларда қолдинг?
Кўриб туриб сени кўрмадим,
Сўрадиму мен дарду ҳолинг,
Мен дарду ҳолингни сўрмадим.

              III

Сен тарк этдинг ёруғ оламни,
Сен бутунлай тарк этдинг, ёҳу.
Тингламайсан менинг ноламни,
Тингламайсан, чорасиз оҳу.
Ғамли уйда қирқ кун ёнур шаъм,
Сен ўйимда ёнурсан абад.
Қайта туғиладир дунё ҳам,
Сен дунёга келмайсан фақат.
Оҳим менинг бузгай самони,
Нафасим айланур қуюнга.
Совуқ ерга қўйдикми сени,
Керакмидинг шунчалар унга?!
Йигирма беш ёшда кетдинг сен,
Жуда эрта кетдинг, дўстгинам,
Ҳей, ажал! Мақсадга етдинг сен,
йигирма беш ёшдаман мен ҳам...
Йигирма беш ёшимни қўшдим,
Йигирма беш ёшингга сенинг.
Ҳаддан зиёд бу алам, дўстим,
Бу кун эллик ёшим  бор менинг.
Сен тарк этдинг ёруғ оламни,
Сен бутунлай тарк этдинг, ёҳу.
Тингламайсан менинг ноламни,
Тингламайсан, тингламайсан-ку...

*     *     *

Turkiya Turkchasi